ସ୍ୱାଧୀନତା ଦିବସ ପୂର୍ବରୁ ବୈଜ୍ଞାନିକ ତଥା ସାମାଜିକ କର୍ମୀ ସୋନମ ୱାଙ୍ଗଚୁକ୍‌ ଏକ ଭିଡିଓ ଜାରି କରି ଦେଶର ରାଜନୈତିକ ବ୍ୟବସ୍ଥାକୁ ନେଇ ବଡ଼ ବାର୍ତ୍ତା ଦେଇଛନ୍ତି। ଦେଶରେ ଶାନ୍ତିପୂର୍ଣ୍ଣ ପରିବର୍ତ୍ତନର ଆବଶ୍ୟକତା ଥିବା ସେ କହିଛନ୍ତି। ୱାଙ୍ଗଚୁକ୍‌ ଦେଶରେ ନେତା ବାଛିବା ପ୍ରକ୍ରିୟାରେ ସୁଧାର ଆଣିବା ଉପରେ ଜୋର ଦେଇଛନ୍ତି। ତାଙ୍କ କହିବା ଅନୁସାରେ, ନିସ୍ୱାର୍ଥ, ନିର୍ଭୀକ, ଭଲ ଚରିତ୍ର ଓ ଦକ୍ଷତା ଥିବା ଲୋକଙ୍କୁ ଆଗକୁ ଆଣିବା ଆବଶ୍ୟକ। ଏହି ଉଦ୍ଦେଶ୍ୟରେ ସେ ଦେଶବାସୀଙ୍କୁ ନିଜ ଅଞ୍ଚଳରୁ ଏଭଳି ଯୋଗ୍ୟ ବ୍ୟକ୍ତିଙ୍କ ନାମ ପ୍ରସ୍ତାବ କରିବାକୁ ଆହ୍ୱାନ ଦେଇଛନ୍ତି। ଏହାକୁ ସେ ‘ଭାରତର ଦ୍ୱିତୀୟ ସ୍ୱାଧୀନତା ଆନ୍ଦୋଳନ’ର ଆରମ୍ଭ ବୋଲି ଅଭିହିତ କରିଛନ୍ତି। ଦେଶର ରାଜନୀତିରେ ଅପରାଧିକ ମାମଲାକୁ ନେଇ ମଧ୍ୟ ୱାଙ୍ଗଚୁକ୍‌ ଚିନ୍ତା ପ୍ରକାଶ କରିଛନ୍ତି। ଏଭଳି ସ୍ଥିତି ଯୋଗୁଁ ଜନସାଧାରଣ ଓ ଶାସନ ବ୍ୟବସ୍ଥା ମଧ୍ୟରେ ଭରସା କମୁଥିବା ସେ ମତ ଦେଇଛନ୍ତି। ନିକଟରେ ଝାଡ଼ଖଣ୍ଡର ଛାତ୍ର ନେତା ଦେବେନ୍ଦ୍ର ନାଥ ମହତୋଙ୍କୁ ମଧ୍ୟ ୱାଙ୍ଗଚୁକ୍‌ ସମର୍ଥନ କରିଥିଲେ। ପ୍ରତିଯୋଗିତାମୂଳକ ପରୀକ୍ଷାରେ କଥିତ ଅନିୟମିତତାକୁ ବିରୋଧ କରି ମହତୋ ଅନଶନରେ ବସିଥିବା ବେଳେ ୱାଙ୍ଗଚୁକ୍‌ ତାଙ୍କ ସହ ଭିଡିଓ କଲ୍‌ରେ କଥା ହୋଇଥିଲେ। www.navjivanfoundation.org